Tarantellando in allegria

Su calabrisi e su di li to parti Restai ncantatu appena chi ti vitti E ora pensu attia e non pensu ad atti Sembra chiss'occhi toi su beniditti Stanotti m' inzonnai na grandi stella Nta na vallata costruia na villa La costruia apposta pa me bella Pemmu vivu felici assemi a dilla Arzira eu passai di na cuntrata Nta l'angulu lla c'è na casicella Undi cu ll'occhi mei vijiu affacciata Vijiu affacciata na figghiola bella Bella figghiola chi stai nta sta valli Ammenzu aranci duci e limuncelli E comu si ngarbata quandu parli Cu to surrisu e ccu chiss'occhi belli C'era nu sciuri vicinu alla riva E na figghiola chi lu bbiverava Mentri lu bbiverava si diciva Crisci figghiolu meu e si l'adurava Suli chi surgi e ssi tantu splendenti Ppunti e tramunti e ssi sempri costanti Si ffussi comu attia tutta la genti Comu starremu beni tutti quanti L'amuri è veramenti nu misteru Quandu lu senti duci e quandu amaru Quandu lu senti duci è amuri veru Si no ssu cori tenitillu caru Veni bella veni mu ballamu Veni figghiola ca ndi divertimu Chi stasira vogghiu u ndi scialamu Veni a ballari pecchi' in tanti simu Si vvoi mu veni vegnu mu ti pigghiu Stasira assemi a nui eu ti vogghiu Ma poi ndaiu bisognu u mi ripigghiu Pecchi si balli tu squagghiu e mi sciogghiu Faciti rota faciti rota Vi presentamu l'ultima girata Mu fati comu e mastri di na vota Pemmu risplendi sta bella sirata