Visserman

Staan daar met jou siel in die diep blou see

Die golwe se geroep trek jou in en voer jou mee

Ek wonder wie jy is, ek wonder wat jy sien?

Ek wonder of dit rustig is in jou mens masjien?

Die winde is koud en die lig is grys

Maar dit is jou wêreld en daar word jy wys

Die dag is verby skuins voor sewe

Jy rol die lyne op elke dag van jou lewe

Het jy verloor of het jy gewen?

Soek jy 'n kans om my wêreld te ken?

My wêreld het son

Jou wêreld het reën

Jou wêreld het rots

En myne net steen

Ek sit hier met siel langs die water

By kerse en klanke wêreld se alma mater

Ek wonder wie jy is en ek wonder hoe jy lyk?

Ek wonder hoe dit voel om in jou bloues te kyk?

Hier binne is dit snoesig, die ruite mooi skoon

Maar is dit my plek, my gekose droom?

Oorkant die tafel 'n leë stoel

Maar jammer my larney

Nie vir jou bedoel

Het jy verloor of het jy gewen?

Soek jy 'n kans om my wêreld te ken?

My wêreld het son

Jou wêreld het reën

Jou wêreld het rots

En myne net steen

Ja myne net steen

Het jy gewens dat jy binne kon wees?

Wil jy kerse sien, spyskaarte lees?

Sou dit ooit werk as ons plekke kon ruil?

Sou jy binne lag en ek buite huil?

Ek weet jy's uit jou plek

Hulle hou jou vir die gek

Ek weet my hart is buite

Aan jou kant van die ruite

Ek en jy leef in twee wêrelde

In myne die son

En in joune die reën

Maar ek is niks minder

As jy alleen

En ek is niks meer

As jy geseën