Interpret: Bläck Fööss
Komponist/Texter: Martin Graf
Verlag: Manuskript
Wer stirv vür mir un wer stirv noh mir?
Sitz de Iewichkeit nevven mir?
Darf ich nur Blockflööt spille
oder han se für mich e Klavier?
Kann ich vun bovven en de Höll' sinn?
Es et em Hemdche nit och ens jet kalt?
Weed ich op eine Schlag widder jung
oder bliev ich senil un alt?
Jitt et nur dä söße Meßwing
oder krieje ich och ald ens e Bier?
Wann jitt et nohmeddachs Kaffee
öm drei oder öm vier?
Jeiht öm zehn Uhr och wirklich
et Leech us?
Weed vür'm Schlofejonn noch ens jebett?
Lieje ich op weiche Wolke
oder lieje ich em richtije Bett?
Refr.:
Ich froch mich, wie weed
et em Himmel,
denn do kumme ich jo hin.
Dat es völlig klar, dat weiß ich jenau,
weil ich su ne joode Kääl ben.
Hoffentlich treff ich do bovven
ming Fründe
un hoffentlich nit minge Chef.
Han die Engelcher richtije Flüjel
oder sin die nur anjekläv?
Sitz dä Herrjott bei uns met em Zemmer
oder hät dä en eijene Bud?
Hät singe Jung noch immer die
Tricks drop
met däm Wasser, däm Fesch un
däm Brud?
Refr.:
Ich froch mich, wie weed
et em Himmel,
denn do kumme ich jo hin.
Dat es völlig klar, dat weiß ich jenau,
weil ich su ne joode Kääl ben.
