A serenata d' 'e rrose

"È mezanotte, e cu 'stu mandulino,

I' canto a 'stu barcone chino 'e rrose.

Saglie 'n'addore 'arancio d' 'o ciardino

E 'st'aria doce vene a prufumà.

'A luna janca me pare d'argiento,

Sbattute songo 'e rrose da 'stu viento.

Oje rrose meje,

Si dorme chesta fata,

Scetatela cu chesta serenata!

È mezanotte, e i' canto 'sta canzona

Cu 'e sciure e cu ll'aucielle 'ncumpagnia.

Quanta suspire e quanta passiona

Dint'a 'stu core mio tengo pe' tte.

Suspire mieje, vulate a 'stu barcone!

Facite sentì a Rosa 'sta canzona!

Oje rrose meje,

Si dorme chesta fata,

Scetatela cu chesta serenata!

Oje luna, pecché ride e tiene mente?

Pecché mò nun faje luce a 'stu barcone?

Cu chisti ragge tuoje tanto lucente

Famme vedè si Rosa mò nce sta!

Vola, canzona mia, vola, canzona!

Rusina me fa 'a spia for' 'o barcone.

Oje rrose meje,

Essa mò s'è scetata!

Purtatele, pe' mme, 'sta serenata!"