Wiste Weyira

ካይምሮዬ ጓዳ ቃላት ለቃቅሜ

ከልቤ ማሣ ላይ ስሜቴን ቃርሜ

ብሞክር ልስልሽ ባምጥሽ ባምጥሽ

ስም አልባ ኾነብኝ ረቂቅ ውበትሽ

ረቂቅ ውበትሽ የልቤ ያይኔ ዐዋጅ

የማነሽ እኩያው የማነሽ ተጣማጅ

እንቡጥ ጽጌረዳ የመስከረም ዐደይ

የተስፋ ማለዳው ልጅነት የጸደይ

የዘመን ጌጥ ነሽ ወይ አምሳለ ሰው ዕንቁ

ሲያይሽ እሚጠግብ የሕዝበ አዳም ስንቁ

በሚመጥንሽ ቃል በሚመስልሽ ቀለም

የሚሞክር እንጂ፣ የሚገልጥሽ የለም

ካይምሮዬ ጓዳ ቃላት ለቃቅሜ

ከልቤ ማሣ ላይ ስሜቴን ቃርሜ

ብሞክር ልስልሽ … ባምጥሽ ባምጥሽ

መልክ አልባ ኾነብኝ ረቂቅ ውበትሽ

የማታ ጀምበር ነሽ የሕይወት አመሻሽ

ዓለም በቃኝ ያለሽ ጽድቅ መዳረሻሽ

ወይን ጠጅ ነሽ ወይ የጣዕም ምናኔ

እንዴት የ'ጣሽ ክፋይ አልገባ አልሽኝ እኔ

ቸገረኝ ልብ አጣሁ ልረዳሽ አልቻልኩም

አንቺማ ረቂቅ ነሽ እኔም አልጎበዝኩም

የማነሽ ቅኔ ሰብ የማነሽ ምስጢር

ስንቱ ራሱን ጥሏል ሊያገኝሽ ሲጥር

የማነሽ ትንሣኤ የማነሽ መከራ

ውበትሽ ጸባይሽ ቅኔ ውስጠ ወይራ

ሸማሽ ያገር ባሕል ዘርፉ የባንዲራ

ሙዳየ ቃልኪዳን የእግዜር ድንቅ ሥራ

ፍጹም ውስጠ ወይራ

የእግዜር እጹብ ሥራ

ፍጹም ውስጠ ወይራ