Wasany Aboya

وصاني أبويا وقاللي شوف أنا خلفتي خلفة رجال

والراجل الجد بصحيح يعرف ينام مرتاحله بال

يعني الخلاصة من الكلام ع الناس يا ولدي ما تفتريش

وإياك تغرك دنيتك بوهم سلطان ما يساويش

عيش الحياة من غير جحود، مش ناس تموت علشان تعيش

ومهما كان الريح شديد ولد الغلابة ما ينحنيش

وما تطاطيش للدنيا يوم وإياك تميل لو حالها مال

أياك تميل لو حالها مال، خليك عتيق زي الجبال

وصاني أعيش بين البشر راسي رافعها لفوق

ومخافش غير من ربنا ولا أنحني لمخلوق

وصاني أكون زي الميزان وأعدل ما بين الناس

وأرجع للضعيف حقه من أكلين الحقوق

وقاللي الحق مهما يغيب بيرجع تاني لأصحابه

يا ويله اللي بيستقوى يجيله الهم على بابه

وقاللي الكدابين خايبين، مسيرهم يتكشف حالهم

بيمهل بس ما بيهملش، يا ويل الظلم وحسابه

هتعمل خير تلاقي الخير، لينا يا ولدي رب كبير

يقبل دعوة المظلوم والظالم حسابه عسير

ما دام رب العباد موجود مسير الحق بكرة يعود

ولا هتعمل لشيء حسابات ما دام من ربنا مسنود

وقاللي الكبير هو اللي عاش شايل هموم الناس

قاللي الكبير عزوة وسند مش منظرة وخلاص

من صغره ولحد الكبر من طلته تهابه

ولا عمره جه يوم ع الضعيف ولا داس في يوم ع الناس

آه، هتعمل خير تلاقي الخير، لينا يا ولدي رب كبير

يقبل دعوة المظلوم والظالم حسابه عسير

ما دام رب العباد موجود مسير الحق بكرة يعود

ولا هتعمل لشيء حسابات ما دام من ربنا مسنود

خليك عتيق زي الجبال