Act I Scene I : A bhean ró-dhána

ARD-RÍ NA hÉIREANN

A bhean ró-dhána, an mise an tArd-Rí? Bhfuil meas ar mo bhriathra?

NUALA

Ná salaighse do cháil le beart neamh-fhialmhar.

ARD-RÍ NA hÉIREANN

Labhrann an toice mar mhnaoi le cumhacht.

Níl brí agam ina coinne. Tá mo chroí fá bhuairt. Abair, a bhean liom, nach bhfuil dom réir. Cluinim an freagra gan mhoill ód' bhéal.

NUALA

Freagród gan mhoill, gan aon mhoill.

ARD-RÍ NA hÉIREANN

Créad fáth nár chuibhe do chlann seo an bhróin a gclaonbheart nimhe do chúiteamh leo?

CÓR IOMLÁN

Freagair, a thoice, freagair! Créad fáth nár chóir a gclaonbheart nimhe do chúiteamh leo?

NUALA

Freagród gan aon mhoill.

Éistíg' liom go fóill. An tráth a mbíonn an spéir fá scáil ní léir dúinn áilleacht, bláth, is scéimh na mbánscoth n-íseal nglé gan cháim na bpéarla ngnáith ar bharr na ngéag luisne an róis go modhúil caoin lasadh caor i lár na gcraoibh.

Gan brí na seoid, ní thógann croí. Ní thógann croí go taitneamh gréine is bánú an lae.

An tráth ar líonta an croí le gruaim, dá chloí ag buairt is léan an tsaoil, is gnáth go mbíonn an intinn dubhach gan fíorbhreith rún, gan éifeacht gníomh.

Ach nuair a lasas grá sa chléibh, mar ghaethe gréine tríd an gceo, is luath a scaipeas scáil is léan, is blastar séan is aoibhneas cóir.

Níl ceol is binne ar chruit sa tsaol ná seinm Aonghuis1 Óig na nÉan.

Is eol don duine a chluineas é créad ann is aoibhneas, sógh is séan.

ARD-RÍ NA hÉIREANN

Cén bhrí atá ina glór seo, a bhíogas grá chomh mór ionam go sílim nach beo dom ar nós daoine an tsaoil?

Nó arbh é Aonghus áigh an Bhrógha do labhair trína béal?

NUALA

Níor mhór an síon le Diarmuid2 áigh ód' chuala gáire grinn na dtéad. Ó tabhair de shíor is iarr an grá, is fuath go brách le dílse séan.