Bierfahrerbeifahrer

Er wohnd seit zehn Johr do, doch woaß ned genau, warum

Koana loddna ei außa da Landfraunbund

Aba do hoda scho olle ghabt, er sedzd sei Basknmützn auf

Und schaud auf guad Glück nauf ins Schützenhaus, jau

Da François hods schwaar, dem Bayrischn ned mächtig

Filterlose Gauloises und seine Weine san verdächtig

Da Ferdi hoid eam 's Gwehr hi

Des oanzige boarische Woat, des a konn, is „Merci” (Merce)

Er zield und druggd ob nochm vierdn Stamperl

Dawischt ned de Scheim, sondan an Bierfahrer Andal

Es is mucksmeisalschdaad, sei komplette Entourage schaud nüba

Zum François und der sogt: „Uh-la-la-la-la”

As Gschroa is riesengrouß, da Andal bliat am rechtn Unterarm

„Wie soi i denn bloß moang alloa mei näxte Rundn fahrn?”

Schoitn und lenkn mit nur oana Hent, des is hoid a wenge schwaar

Noch dera Blamage fia'n François zoagda Courage voa da Bagage

In da Garage schdähd a parat am näxtn Dog in da Fria

Er woit nia an Job, doch etz hoda oan kassiad ois

Bierfahrerbeifahrer

Bierfahrerbeifahrer

Bierfahrerbeifahrer

Am Bierfahrer sei rechde Hand

Lang lebe da Ganghebe, da Franze schoit in sechstn

Und übersedzt im Feuilleton vo Bertl Brecht a Gsetzl

In da Rechdn an Sauvignon Blanc aus da südlichn Provence

Aba des schmeggd am Andal goa ned, er valiad de Contenance

„Du saufst di in Trance und i muaß ständig foahrn

Unsa Orbatsaufteilung is a weng aus da Balance”

Da Franze sogt: „Oui, oui”, und schenggd se no a Schlückerl ei

Da Andal meydna einfach o fian Lastwongführerschein

Aba da Franze simuliert Probleme mit da Sicht

So kimmd a zua näxtn Schicht mid ana Aunglabbn im Gsicht

Da Andal sogt: „Etz glangts fei, vaasch mi ned de ganz Zeid

Du host koan graua Star vo de Schwarz-Weiß-Filme aus Frankreich!”

Da Franze lasst an Lasta o und innerlich, do lachda scho

Da Prüfer konns ned fassn, sogt: „Monsieur, Sie ham ja Glabbal o!”

So foida durch, bevor a überhaupd rausfohd

Da Plan gähd auf, er bhoit si sein Traumjob ois

Bierfahrerbeifahrer

Bierfahrerbeifahrer

Bierfahrerbeifahrer

Am Bierfahrer sei rechde Hand

Oisse bleibd, wias is, da Andal nimmd des Ganze locka

Nochm letztn Stopp bleims' no auf an Schoppn hocka

Wein zum Dringa is fian Andal immer no recht seydsam

Drum hauds eam zwecksdm Mischkonsum as Gschdey zamm

Rien ne vas plus, da Franze deckt'n zua

Kokketiert mit da Wirtin, aba nixe kimmd redour

Am Andal sei Handy leit, der drammt no aufn Diwan

Da Braumoasta ruafd o, er gähd hi und und frogt: „Wos isan?”

„Da Nachbarverein hod in da Nachspuizeit d' Relegation verlon

'S Bier is aus, es muas a Nachschub rei, des wead a Nachtschichd für eich zwoa!”

Da Andal aufm Kanabee schreid: „Ándale! Ándale!”

„I kanndad nimma fohn, sogoa wenns iagendwie no gangad, he”

Da Franze drahd an Schlüssl um, gibt Gas, sie san vom Hof groid

Kupplung fangd zum Stinga o und koana hod si ogschnoid

Er manövriert, ois häd a nie wos andas drimm

Doch aufamoi gibts a Fröschewanderung voa Oberframmering

Ois Connoisseur dafoda koane Delikatessen

Er weichd aus, da Wong foid um, in hohm Bogn fliang de Kästn

As Führerhaus loderd, da François kimmd aussagrocha

Sei rechda Oam is dobbed brocha, drodzdem konna locha

Ziagd an Andal aus de Flammen und griagd Genshaud

Weila woaß, dasa nua sei lingge Hent brauchd ois

Bierfahrerbeifahrer

Bierfahrerbeifahrer

Bierfahrerbeifahrer

Am Bierfahrer sei rechde Hand

Ois wie ghabt, zwoa lingge Hent schaun nochm Rechdn

Einarmige Banditen, de si mittlerweile schätzn

Sie trottn aufm Trottoire, koana konn ihr Glück vaschdeh

Wenns midanand a Dragal drong, muas oana imma rückwärds geh

(Geh, geh, geh, geh, geh)