Metafisica

Se dice ca p''o Vommero ce steva

‘Na fata cu' ‘na vesta a fronne ‘e rose

Capille janche latte comm''a neve

Addore de gerani e malvarosa

Uocchie celesti turchini cchiù d''o mare

Pazziella ca se perde ‘nmiezo ‘e mulliche ‘e pane

“Ammore, si 'o munno more

Statte cu' mme…”

E volano l’aucielle fra ricordi e cieli nire

Ddoje sore e ‘na matrigna chiena ‘e ‘mmiria

Tremila suricille annanze a ‘na cucozza

Ca pe’ magia addiventa po’ carrozza

Fata, sì mamma e sì candela

Appiccia ‘a luce quanno ‘a notte vene

Fata ca spiezze 'stì catene

E a ogni Cenerentola vuo' bene

Se dice ca p''o Vommero ce steva

‘Na fata cu' ‘na faccia assaje curiosa

‘A ciorta d''e perzone essa leggeva

E te sapeva dicere ogne ccosa

Core ‘e cristallo, aret'a 'na mantella

Fatt''e suonne perdute e cu' vriccille ‘e stelle

“Stasera, si ‘o munno more

Statte cu' mme…”

Torna piccerè, primma c''o tiempo se n’accorge

Fuje appriesso 'e lancette d''o 'rilorgio

‘Nu principe ‘nzeriuso ca tutt''e sere aspetta

Chi femmena ha perduto ‘na scarpetta…

Fata, sì mamma e sì candela

Appiccia ‘a luce quanno ‘a notte vene

Fata ca spiezze 'stì catene

E a ogni Cenerentola vuo' bene