ភ្លៀងប្រាំយប់ប្រាំថ្ងៃ

I-ផ្គរលាន់អើយ!គ្រឹមៗៗ គ្រហឹមហៅភ្លៀង

មេឃខ្មៅងងឹត បេះដូងភ័យភិត ចិត្តនឹកដល់នាង

សន្យាណាត់ជួប សង្សារសំណព្វ យប់នេះមិនល្អៀង

អង្វរទេវតា បន់អស់អ្នកតា សុំមេឃកុំភ្លៀង

ក្រោយបានជួបនាង... កូនចៅសុំសែនមាន់ពីរ។

II-មេឃធ្លាក់ភ្លៀងខ្លាំងៗ ទឹកឡើងហៀរទ

លិចស្រែលិចអូរ លិចជើងសរសរ ជណ្ដើរកាំពីរ

ភ្លៀងខ្លាំងដាច់ផ្លូវ ធ្វើម្ដេចបានទៅ ជួបពៅឆវី

ភ្លៀងមិនព្រមរាំង ដាច់ដីផ្ទាំងៗ គោអត់ស្មៅសុី

ទ្រូងបងទក់ទី... បារម្ភនារីអូនចាំផ្លូវបង។

III-ភ្លៀងមិនប្រណី ប្រាំយប់ប្រាំថ្ងៃ លិចដីភូមិផង

មានតែជិះទូក ស្កាត់រកពន្លក ព្រលឹងស្នេហ៍ស្នង

កុំខឹងបងណា អស់ឱ!សង្សារ ទាវតូចទងវង

ខកខានប្រាំថ្ងៃ អរគុណពិសី នៅតែចាំបង

ទឹកគោកវិញនួនល្អង... បងឲ្យពុកម៉ែចូលចែចូវ៕