Яулыгым

Чит-яттан каплар, кызудан саклар,

Җил-давыллардан җылытыр, яклар.

Нәни чагымда әнкәем биргән,

Битемнән үбеп, яратып төргән.

Күз яшен сөрткән,

Кадерләп йөрткән,

Балачагым ул - матур яулыгым.

Иң кадерлесе никах көнемдә,

Кадерләп саклыйм әле бүген дә.

Килен төшүнең тәүге бүләге,

Милли бизәгем - тормыш күгендә.

Чәчемә үргән,

Хезмәтем күргән,

Истәлегем ул - нәфис яулыгым.

Гасырлар аша гадәткә кергән,

Апалардан ул сеңелгә килгән.

Тарихыбызның онытылмаслык

Милли бизәге - һәр кеше белгән.

Нәсел билгесе,

Милләт өлгесе,

Әбкәмнең төсе - мамык яулыгым.