Clip vidéo
เเหล่(อีสาน) พุทธะคำกลอน เขิงคำ - ลายพิณ ชินราช
Titres les plus populaires de ลายพิณ ชินราช
Paroles
ฟังเอาถ่อน คำสอนโลกใหม่
ไผผู้ยังบ่ฮู้ เขิงแก้วสิฮ่อนคน
ฟังเอาเถิดพี่น้อง เผิ่นสิฮ่อนคนดี
ไผผู้มีศีลธรรม สิอยู่เขิงคาค้าง
ไผเดินทางเด้อผิดเส้น ทำโตเป็นคนชั่ว
มันสิลอดกระด้ง บ่มีค้างแผ่นเขิง
เขิงแผ่นนี้ ชื่อว่าเขิงคำ
เป็นเขิงธรรมคำสอน หน่อพุทโธทรงตั้ง
เผิ่นได้วางเอาไว้ บนพื้นโลกโลกากว้างใหญ่
เป็นเขิงคำตั้งแต่เค้า พระองค์เจ้าว่ามา
พระศรีอารย์เผิ่นสร้าง โพธิ์ศรี ๓ ห่ม
เอาคนเข้าอยู่ซ่น โพธิ์แก้วห่มเย็น
โพธิ์ต้นนี้ บ่ได้ปลูกตามดิน
เป็นโพธิ์ศีลโพธิ์ธรรม หว่านมาแต่เมืองฟ้า
เอามาให้คนฮู้ ครูเฮาสอนสั่ง
คำพระสังฆเจ้า โบราณเว้าว่ามา
แล้วบัดนี้... สิได้กล่าว ๓ โพธิ์
หากแม่นแนวคำสอน บ่อนพระองค์นำชี้
โพธิ์ ๓ ต้น คนเฮาสิได้เผิ่ง
ตกมาฮอดหว่างข่อน ตอนท้ายศาสนา
พระศรีอารย์เผิ่นสิลงมาค้น หาคนผู้ประเสริฐ
เลือกเอาผู้เลิศล้ำ นำเข้าฝ่ายเดียว
คนขบดคดเลี้ยว ทำชั่วสามานย์
ยมพบาลสิมามัด ผูกคอลงหม้อ
ให้ทำดีเอาไว้ ถนอมโตเข้าซ่นห่ม
มนุษย์สาโลกกว้าง คนสิล้มถ่าวตาย
เผิ่นสิคัดเลือกไว้ ๓ ห่มโพธิ์ศรี
ให้พอดีกับคน อยู่เขิงคำแก้ว
มันหากถึงคราวแล้ว คนเฮาอย่านอนอยู่
ให้พากันตื่นถ่อน นอนนิ่งบ่เบิ่งหยัง
เดี๋ยวนี้แสงธรรมเจ้า องค์พุทโธกำลังส่อง
มองให้ใสหากเจิดจ้าว แสงธรรมเจ้าให้ส่องมา
หวังว่าโลกากว้าง ปวงประชาชาวโลก
พ้นจากมารหมู่ฮ้าย ใจเจ้าสิชื่นบาน
อย่าพากันเกียจคร้าน เด้อท่านให้ถือศีล
ถ่าไปกินนำพระศรี ผู้เผิ่นมีบุญล้น
ไผผู้ทนเอาได้ มีใจหมั่นเที่ยง
กะจักถึงแห่งห้อง เมืองนั้นอยู่เกษม
ทุกสิ่งในโลกนี้ ล้วนแต่อนิจจัง
วัฏสังขารา บ่เที่ยงตรงดอกน้อป้า
ให้ทำดีเอาไว้ ถนอมโตเข้าซ่นห่ม
ให้พากันก่อสร้าง ทางสิได้เข้าฮ่มโพธิ์
อย่าทำโตเป็นคนโก้ หากินนำคนโง่
ฮู้ว่าเขาโง่แล้ว อย่าไปซ้ำตื่มแถม
กรรมสิแนมนำส่น บ่ทันดนสิเห็นดอก
ไผผู้ทำชั่วช้า กรรมฮ้ายหากสิเห็น
มันสิลอดกะด้ง บ่ค้างหว่างตาเขิง
อย่าทำโตเลวทราม ให้จื่อจำเด้อเอาไว้
นี้เป็นคำของไท้ องค์พุทโธสอนสั่ง
ขอให้ชาวพี่น้อง ฟังแล้วให้เจื่อเอา
จั่งสิเห็นทางเข้า โพธิ์ศรี ๓ ห่ม
ไผบ่ฟังผู้น้อย ขืนดื้อยักษ์สิกิน
โลกยุคนี้ เป็นยุคใหม่ภัยมหันต์
ศาสนาสองพัน ล่วงมาถึงแล้ว
คนเฮาแซวๆ เว้า โลกาบ่คือเก่า
บางผ่องเจ็บ บางผ่องไข้ตายไวเกินขนาด
โลกประหลาด ก็หากมาใหม่เรื่อย ยาแก้ใส่บ่ทัน
อัศจรรย์น้อป้า โลกามันเปลี่ยน
บ่เคยเห็นกะส่างพ้อ น้อนี้จั่งแม่นกรรม
คันว่าทั้งฝนฟ้า ชลธารบ่คือเก่า
คันว่าตก ก็หากตกมาล้น จนถ่วมทั่วแดน
คันว่าแล้ง ก็หากแล้งกะด้อ จนแผ่นดินแห้ง
คันว่าหนาว ก็หากหนาวพาโล ต่างหลังน้อเหลือล้น
คนเฮาพากันส่วย ซวยไปหมดทุกอย่าง
ภัยพิบัติต่างๆ ก็หากมาเกิดขึ้น เห็นได้สู่อัน
มีทั้งลม ไฟ น้ำ ทั้ง ๓ ฮ้อนแห่ง
สิมาเต็งตื่มซ้ำ ทำให้มุ่นวาย
คนจักตายไปพร้อม นาๆ นับบ่ข่วย
คนสิได้เดือดร้อน ทางสิพ้นแม่นบ่มี
เหลือแต่โพธิ์ศรีส้อย คน ๓ ขุมจั่งสิได้ซ่นห่ม
คันแม่นนอกกว่านั้น เฮฮ้อนห่มบ่มี
ไผทำดีคงค้าง เขิงคำน้อพ่อ
คันไผทำชั่วช้า เมืองฟ้าอย่าสรวง
มีแต่จมลงพื้น อเวจีหม้อใหญ่
ท่านพระศรี เผิ่นกะส่อยบ่ได้ ไฟไหม้ถ่าวธุลี
อันนี้มันหากมีในห้อง ครองธรรมพระเจ้ากล่าว
ผู้น้อยบ่ได้สามารถเว้า เขียนแต้มแต่งมา
ขอให้นักปราชญ์เจ้า ฟังเอาถ่วนถี่
ฮู้เหตุเรื่อง ฟังแล้วให้หิ่นตรอง
คนเฮานี้คันบ่ออกนอกบ้าน บ่เห็นด่านแดนไกล
คันบ่ไปหาเรียน บ่ฮ่อนมีความฮู้
คันว่าเฮียนฮู้แล้ว บ่ทำตามจักอย่าง
แม่นสิฮู้ท่อแผ่นฟ้า ก็เป็นบ้าท่อแผ่นดิน
ไผได้ฟังคำเว้า องค์พุทโธสอนสั่ง
ขอให้สุขยิ่งล้ำ ปัญญาล้นหลื่นคน
กับทั้งโพยพายฮ้าย อันตรายอย่าบังเบียด
กับทั้งทุกข์ร้อยชั้น ขอให้ผ่ายหนี
ขอให้มีสุขล้น เกินคนในโลก
ให้ไปถึงแห่งห้อง วิมารพุ้น
อยู่เกษม แล้วหละนา..อีแม่เอ้ย....เอ้ย
Written by:
