ลำล่อง ขี้ยากลับใจ

เห็นน้ำตาพ่อแม่ย้อย ลูกเข่าหล่อยย้อนหลงผิด จนได้ติดจองจำพ่อแม่นำมาเยี่ยม

พ่อแม่เตรียมมาแต่บ้าน หอบหลักฐานเทิงย่านสั่น ย่านบ่ได้ประกัน

เพิ่นเป็นห่วงลูกเต้า เทิงเว้าก่องน้ำตาเด้น้อ พ่อแม่ฮักท่อฟ้าถึงลูกชั่วมัวหมอง

จับลูกกรงยืนมอง

พ่อแม่เอ้ยอยากเมือบ้าน ลูกเคยผลาญลูกเคยไหม้ ผิดไปแม่บ่ว่า หลงคบเพื่อนชั่วช้า

ติดยาบ้าจนจ่อยเหลือง กว่าสิมาฮู้เรื่องพ่อแม่ฮักถืกจับขัง

ผู้ใด๋ชังผู้ใด๋ฮักฮู้แก่ใจไขแจ้ง เพื่อนฮักแพงบ่เห็นหน้า ยามผิดมาหมาโตหนึ่ง

คนที่ฮักลึกซึ้งคือแท้พ่อแม่เฮา

สาธุเด้อ ลูกสาบานต่อหน้าเจ้า สิเซาทุกอย่างในทางผิด เป็นบทเรียนของชีวิต

พิษภัยของยาบ้า การศึกษากะเลยถิ่มย้อนหลงเม็ดหมากล่ำ ถืกจองจำจังอ่าวโอ้

โฮฮ้องก่องน้ำตา เหลือโตนแต่นั้นหนา เพิ่นเป็นทวงถาม ลูกเลวทรามบัดซบ

คบหมู่พานสันดานเหี้ย เสียเงินไปแม่กะบ่เคยว่า ตั๋วเอาเงินชื้อยา

เสพแล้วสมองเหลี่ยน

เสพแล้วสมองเหลี่ยน เสพหลายๆจนว่าเพี้ยน เป็นบ้าจนว่าหลอนเด้น้อ

สร้างแต่ความเดือดร้อน พ่อกับแม่ละแป๋ตาย ลูกทำลายอนาคต พ่อแม่แปลงทางไว้

แม่ส่งไปเรียนรู้หวังอยากให้เป็นครู คือลูกชาวบ้านเผิ่น ลูกหลงเพลินชั่วช้า

ติดยาบ้าฮ้อดบ่เรียน เสพหลายๆจนว่าเพี้ยน นิสัยเปลี่ยนไปทันที ก่อคดีมานาน

จนทางการเผิ่นจับได้ ขออภัยเด้อแม่ลูกบ่ได้ดูแล แม่ยังเอาข้าวส่ง

 จกจากถงเงิน400 เอาฝากไว้กับผู้คุม คิดขึ้นมาแล้วกลุ้ม งุ้มกะง่อนนอนอุ๊ก

 เฮาได้มานอนคุกจ่องลูกกรงหลงฮ้อง ตาเหลี่ยวมองดูคุณแม่ เห็นเชิงแพร แม่เปียกชุ่ม

เสียงผู้คุมเพิ่นฮ้อง เบิ๊ดเวลาเยี่ยม ละแม่เอ๋ย โอ้ยน้อ......