ទឹកអូរយ៉ាដា

ពេលព្រឹកព្រលឹម ញញឹមសែនស្រស់

ត្រូវនឹងសម្រស់ ធម្មជាតិព្រៃភ្នំ

បុប្ផាឈើព្រៃ ខៀវខ្ចីសុខុម

សមខ្លួនក្រមុំ សប្បាយរកគ្មាន

ទឹកអូរយាវដាវ ខោអាវធ្លាប់គក

ធ្លាប់ងូតធ្លាប់លង់ ធ្លាប់ក្បង់ស្រព្វប្រាណ

ថ្ងៃនេះចិត្តខ្ញុំ ចំលែកប្លែកបាន

សូមអ្នកជួយស្មាន ស្ទង់ចិត្តខ្ញុំផង

ខ្ញុំស្រឡាញ់គេ ទ្វេមួយជាបី

តើគេបេត្តី ខ្ញុំវិញទេបង

ចិត្តអើយរែងខ្វល់ អំពល់កន្លង

មិនគួរចំណង ចងចិត្តដល់ម្លឹងអើយ

អស់លោកអ្នកតា ព្រៃភ្នំទាំងឡាយ

ខ្ញុំសូមថ្វាត់ថ្វាយ ជូនជាដំណឹង

ខ្ញុំស្រឡាញ់គេណាស់ ស្ទើរបាត់ព្រលឹង

មេត្តាជួយដឹង ជួយឮខ្ញុំផង

ទោះស្លាប់ក៏ដោយ សូមអោយជួបគ្នា

មុឺនសែនវេទនា ក៍នៅតែផ្សង

សូមជួបជាតិនេះ កុំបីកន្លង

ជួបជាគូគ្រង់ លុះអវសាន្តអើយ