عملولي سحر بوقف الحال

ياما قالولي إني شبهك

في الملامح حتة منك

قلبي أبيض زي قلبك قلت: ياريت

عملولي سحر بوقف الحال

أقرب ماليا عامل أعمال

غير حياتي بطريقة شمال

طلع بيكرهني

شفت اللي سابني وقال مفارق

لما شافني سابني غارق

ده اللي كنت بقول زميلي مبصليش

دلوقتي نفسك ثم نفسك

اكتم وخبي جوه قلبك

ولو مفكر حد جنبك لا مفيش

كان ليا صاحب بروح إليه

معرفش سابني لوحدي ليه؟

جايز أكون تقلت عليه بمشاكلي وهمومي

بعد أما كنت أنا وإنت إخوات

تطلع بايعني لأجل بنات

عشمت فيك العشم أهو مات

الحزن بقى لوني

قلتلها بكرا أنا هبقى حاجة

ضحكت وبصلتي في سذاجة

قالتلي روح الله معاك

ده يا مين يعيش

وبعد ماحلوت سنيني

الفلوس عربية صيني

جات تقولي ليه ناسيني مرجعتليش؟

تشهد عليا ليالي الخوف

أنا وشي كان باهت مخطوف

مستني منك أي حروف

ولا إنتي شايفاني

سبحان مغير الأحوال

شفت الزمان أهو لف ودار

حبك لقيته من قلبي اتشال

وإنتي اللي جايالي

ياما قالولي إني شبهك

في الملامح حتة منك

قلبي أبيض زي قلبك قلت: ياريت

مانا أمي دي كل الحكاية

م البداية للنهاية

ملقتش غيرها واقف معايا بيها اكتفيت

أمي القمر وسط الضلمة

هي الونس هي اللمة

نطق لساني أول كلمة

حرك وقال: ياما

هي اللي شالتني وتعبت

شافت كتير وكتير صبرت

وعمرها مني ما ملت

أمي ديا الجنة

اللي تاعب قلبي إني

شقيت كتير من صغر سني

مشيت طريقي غصب عني طب وأعمل إيه؟

سيبني أقولك إنجازاتي

الاكتئاب دمر حياتي

كل يوم سهران ليلاتي معرفش ليه؟

عملولي سحر بوقف الحال

أقرب ماليا عامل أعمال

غير حياتي بطريقة شمال

طلع بيكرهني

قدامي يبقوا أعز أحباب

وفي ضهري حبل كلام متساب

لابسين لي ألف قناع كداب

ليه كله دمرني؟

وسط المدافن أبويا نايم

سابني وسط المر عايم

لأ مفيش ولا بر باين أروح عليه

شط المحبة مقفلينه

شط الخيانة معبيينه

وابن الأصول الله يعينه طالع عينيه

أحداث حياتي ملخبطة

نفسيا زيرو محبطة

ده أنا لو حكيت اللي جرى

دمعي هيقتلني

الدنيا زي المشنقة

في عينيه دايما ضيقة

في الدور دي عايشة مصدقة

في العادي تظلمني