Этигэ

Әти кулларында күккә очуларым,

Җилкәсендә тойган рәхәтлек,

Истән чыкмас хисләр, күңел канатлары,

Әти сиңа мин мең рәхмәтле.

Бәхет кайда дисәң, әти кочагында,

Җылы карашында әтинең,

Мәхәббәтле дөнья, мәрхәмәтле дөнья -

Син төзегән дөнья, әтием.

Гомер узган саен, якын миңа әти,

Уйларымда аңа эндәшәм,

Тормышымда минем ышанычлы терәк,

Әти сүзе, әти киңәше.

Күз яшьләрең безгә күрсәтмисең, әти,

Сыкранмыйсың, әти, язмышка,

Сиңа сыенганда җил-давыллар тына,

Ямь өстәлә сыман тормышка.

Йөрәгеңдә, әти, синең дөнья гаме,

Матурлыкка ачык күңелең,

Синең белән, әти, без канатлы кошлар,

Мәңге өзелмәсен гомернең.

Гомер узган саен, якын миңа әти,

Уйларымда аңа эндәшәм,

Тормышымда минем ышанычлы терәк,

Әти сүзе, әти киңәше.