Ёд Мекунам

Аз дур ошёни туро ёд мекунам, Дар ҳар куҷо нишони туро ёд мекунам. Аз кӯчаҳои шаҳр хаёлӣ чу бигзарам, Айвони гулфишони туро ёд мекунам. Аз ҳафт ранги тобиши рангинкамони дур, Садрангии ҷаҳони туро ёд мекунам. Дар об дида ҷилваи чашми ситорагон, Чашмони меҳрубони туро ёд мекунам. То бӯи дард бишнавӣ аз шеърҳои ман, Он дардҳои ҷони туро ёд мекунам. Ҳар гаҳ забони хомаам гирад зи изтироб, Лабҳои байтхони туро ёд мекунам. Аз бас дар остонаат мондаст лахти дил, Як умр остони туро ёд мекунам.